Святые благоверные князья-страстотерпцы Борис и Глеб – помогают верующим избавиться от болезней опорно-двигательного аппарата, способствуют примирению враждующих, являются покровителями чистоты и целомудрия. При молитве святым страстотерпцам Борису и Глебу получают исцеления от, казалось бы, неизлечимых недугов. К ним обращаются с молитвой о спасении души близкого или знакомого человека, защите от нечистой силы, о мире на Российской земле.

О житии, подвиге, почитании и некоторых чудесах, можно прочесть в разделе о Борисе и Глебе.

Святым Благоверным князем страстотерпцем Борису и Глебу,
во святем крещении Роману и Давиду

Кондак 1

Избраннии чудотворцы и преславнии страстотерпцы Христовы, украсившии души своя добродетелию и прешедшии поприще временныя жизни в страсе Божии, молите Христа Бога, Егоже даже до крове возлюбили есте, да спасет от бед и напастей и вечныя смерти всех, с верою притекающих и с любовию зовущих к вам:

Радуйтеся, святии страстотерпцы Борисе и Глебе, теплии о нас пред Богом молитвенницы.

Икос 1

Ангельским чином радость сотворили есте, преславная двоице, целомудренный Борисе с кротким Глебом житием своим, зане Христа ради преходящее царство земное оставльше, Господа от всея души возлюбисте. Сего ради и мы, благодаряще Бога, показавшего в вас силу благодати Своея, с любовию вопием к вам:

Радуйтеся, яко вкупе со отцем своим, князем Владимиром, суетных богов уклонистеся.

Радуйтеся, яко к истинному Богу всею душею прилепистеся.

Радуйтеся, прекраснии цвети новопросвещенныя земли русския.

Радуйтеся, пресветлыя звезды присносущаго света Христова в стране нашей.

Радуйтеся, чистоту душевную возлюбившии.

Радуйтеся, дом Духу Святому себе соделавшии.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 2

Видевше, яко в мире сем вся суете и тлению причастна, измлада Христа возлюбили есте, честная братие Борисе и Глебе, жизнь безстрастную стяжавше, славнии целомудрия рачителие. Темже от страстей душевных и телесных молитвами своими свободите почитающих вас и поющих Богу: Аллилуиа.

Икос 2

Разум свой просветив книжным учением, чтение Божественных Писаний, наипаче же душеполезных повествований о страданиих мучеников, зело возлюбил еси, блаженне Борисе: имиже себе и брата твоего Глеба назидал еси, Господа Иисуса Христа со слезами моляше, да не увлекутся суетою мира сего, но да последуют стопам святых мученик, сего ради приимите от нас, святая братие, похвалы сицевыя:

Радуйтеся, путь правый в Царствие Небесное обретшии.

Радуйтеся, сим путем невозвратно шествовавшии.

Радуйтеся, разум свой в послушание веры предавшии.

Радуйтеся, сердцем своим единому Христу служити вожделевшии.

Радуйтеся, российския земли удобрение.

Радуйтеся, всего мира пресветлии светильницы.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 3

Силою благодати Божия укрепляеми, крестным путем Евангельским в житии вашем шествовали есте, благовернии Борисе и Глебе. Темже и нас молитвами вашими от всех козней лукавого диавола укрепите, да непреткновенно возможем проити путем заповедей Божиих и выну воспевати: Аллилуиа.

Икос 3

Имуще пред умныма очима своима образ Христа Господа, усерднии подражателие Ему в житии вашем явистеся: получивше же от отца вашего, князя Владимира, во обладание грады Ростов и Муром, о насаждении в земли вашей веры Христовы и благочестия паче всего потрудистеся, и правосудием, кротостию, смирением и милосердием к бедным любовь народа своего стяжали есте, доблии страстотерпцы Борисе и Глебе. Сего ради приимите и от нашего усердия к вам:

Радуйтеся, вернии ученицы Спасовы.

Радуйтеся, благочестия столпи непоколебимии.

Радуйтеся, родителей ваших с любовию почитавшии.

Радуйтеся, друг друга и братию свою искреннею любовию возлюбившии.

Радуйтеся, целомудрия ревнителие.

Радуйтеся, девства и чистоты хранителие.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 4

Бурею зависти и злобы одержим брат ваш Святополк окаянный, страстию прельстився властолюбия, лиши вас земнаго царствия, святии Борисе и Глебе. Христос же безконечное Царство вам дарова, Емуже со Ангельским воинством предстояще, молитеся спасти любовию поющия: Аллилуиа.

Икос 4

Слышав святый князь Борис, на реце Альте стоя с вои своими, о злом умышлении Святополка, яко хощет его убити, не емляше веры тому, не чаяше бо таковыя злобы от брата, обаче смущашеся мыслию и печалию одержим, вшед в шатер свой, со слезами моляшеся Христу Богу и Пресвятей Богородице, и повеле иерею Утреню пети. Весть же прием, яко приближашася уже убийцы, прилежнее нача молитися, да не поставит сего Господь Святополку во грех. И се внезапу нападоша нань убийцы, и копии прободоша его. Не по мнозе же времени, яко агнец непорочный, заклан бысть на реце Смядыни и блаженный Глеб. И тако предсташа святии братия вкупе в Небеснем Царствии Христу Богу, радующеся. Мы же почитающе мученическую кончину их, усердно вопием:

Радуйтеся, в горних селениих со святыми мученики и со всеми святыми Пресвятей Троице предстоящии.

Радуйтеся, непрестающим веселием наслаждающиися.

Радуйтеся, яко богатство исцелений верующим изливаете.

Радуйтеся, яко от внезапныя смерти почитающих память вашу избавляете.

Радуйтеся, яко веселием духовным сердца наша исполняете.

Радуйтеся, яко предстательством вашим пред Богом печали и скорби наша утоляете.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 5

Боготечныя звезды явистеся, доблии страстотерпцы Борисе и Глебе, на заре христианства в стране нашей, богоугодным житием своим уверяюще соплеменники в спасительности Православныя веры и научающе благодарне пети Богу: Аллилуиа.

Икос 5

Видевше, како святии братия Борис и Глеб, вожделевше будущих благ, паче же любве ради Христовы, царство земное и славу его ни во что же вмениша, никакоже противящеся закалающему их брату, и венцы мученическия получиша, песньми духовными людие российстии их прославляют и радостно зовут:

Радуйтеся, вселенныя заступницы.

Радуйтеся, стране нашей пособницы на враги.

Радуйтеся, маслины плодовитыя, в дому Божии возрастшии.

Радуйтеся, финиксы, добродетелми процветшии.

Радуйтеся, врачеве болящих и бесов прогонителие.

Радуйтеся, в бедах и скорбех призывающим вас с верою скории помощницы.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 6

Проповеди Христове о любви к ближним последуя, Георгий, верный слуга твой, княже Борисе, душу свою за тя положи: хотя телом своим прикрыти тя от врагов, вкупе с тобою убиен бысть. По мале же времени брат твой, благоверный князь Глеб, яко агня незлобив, от своего злаго раба заклание прият, и тако вы трие в чертог небесный внидосте, идеже со Ангельскими чины Богу вопиете: Аллилуиа.

Икос 6

Возсияли есте, яко два светила на тверди церковней, святии страстотерпцы Борисе и Глебе, богоугодным житием своим и мученическою кончиною показующии нам путь к Незаходимому Свету Христу, темже молим вас тму неверия и развращения в стране нашей разгнати, да единомысленно вси взывают вам сице:

Радуйтеся, просветителя Российския страны, князя Владимира отрасли честныя.

Радуйтеся, корене правоверия ветви богонасажденныя, цвети благоухания процветшии.

Радуйтеся, яко во уделех своих Ростове и Муроме идолы потребили есте.

Радуйтеся, яко тму язычества тамо прогнали есте.

Радуйтеся, яко светом Боговедения просвещаете помраченныя умы.

Радуйтеся, яко теплотою молитв ваших согреваете хладная сердца.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 7

Хотя явити новый источник благодати Своея, Человеколюбец Господь нетление дарова честным мощем вашим, боголюбезная двоице, Борисе и Глебе, знаменми и чудесы прослави я. Мы же дивящеся в вас всемогуществу и благости Бога, вопием Ему: Аллилуиа.

Икос 7

Новаго Каина братоубийцу, Святополка победив, благоверный князь Ярослав, и уведев, яко многая знамения и чудеса от гробов ваших, святии страстотерпцы Борисе и Глебе бывают, с радостию поведа о сем митрополиту Илариону, и по благословению его созда в честь вашу церковь в Вышгороде, идеже поставлена быша честныя мощи ваша. Мы же светло празднующе святую память вашу, со умилением зовем:

Радуйтеся, мученическими венцы увенчаннии на небеси.

Радуйтеся, дары чудотворений прославленнии на земли.

Радуйтеся, яко и прежде прославления вашего дивная знамения над гробом вашим являхуся.

Радуйтеся, яко столп огненный и свещи горящия тамо зряхуся.

Радуйтеся, яко тамо Ангельская пения слышахуся.

Радуйтеся, яко при открытии мощей ваших благоухания церковь вся исполнися.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 8

Странники и пришельцы, по Апостолу, явистеся на земли, боголюбезнии Борисе и Глебе, дольняя презирающе, горних взыскующе, все помышление к Богу имуще, братнею любовию совокупльшеся, благочестно пожисте. Темже и нам помозите вашими молитвами добродетельное житие возлюбити и пети Богу: Аллилуиа.

Икос 8

Всею душею и всем сердцем возлюбивше Христа и Церковь Его в жизни временней, братия блаженнии, и по преставлении вашем не оставляете во время благопотребно вразумляти преступающих закон Евангельский и законы церковныя. Сего ради Церковь Святая ублажает вас сице:

Радуйтеся, Господеви, а не человеком угождавшии.

Радуйтеся, на стражи закона Христова стоящии.

Радуйтеся, во граде Дорогобужи жену некую, в праздник Святителя Николая работавшую, разрушением храмины ея и изсушением руки наказавшии.

Радуйтеся, по триех летех с верою притекавшей ко святым мощем вашим жене той исцеление подавшии.

Радуйтеся, двух мужей в Вышгороде в темницу неповинно заключенных, чудесно свободившии.

Радуйтеся, сим чудом великаго князя киевскаго Михаила-Святополка не предавати никогоже на казнь по клевете, вразумившии.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 9

Всякия недуги исцеляти в земли российстей дадеся вам благодать от Бога, яко же великомученик Георгий, во сне явлься некоему слепцу поведа, послав его к вам: он же, пришед в Вышгород, пребываше дни некия при церкви вашей, усердно моляся, и получив прозрение, благодарне возопи Богу: Аллилуиа.

Икос 9

Ветии многовещанныя не могут достойно восхвалити вас, страстотерпцы Христовы Борисе и Глебе, за любовь и милосердие ко всем человеком страждущим: вся бо страна наша исполнися славою чудес ваших, имже удивляющеся, с верою вопием вам:

Радуйтеся, яко всех, призывающих вас с верою, от различных недугов исцеляете.

Радуйтеся, яко вашими молитвами слепии прозреваху.

Радуйтеся, яко вашим ходатайством хромии и безнозии хождение получиша.

Радуйтеся, яко в Вышгороде отроку некоего мужа Мирона-огородника в сонном видении явистеся и крестным знамением сухую и скорченную ногу его здраву сотвористе.

Радуйтеся, во граде Турове инока Мартина, в тяжцей болезни суща, в келлии яве посетившии и исцеление ему подавшии.

Радуйтеся, яко и всем труждающимся скории помощницы.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 10

Спастися хотяще от вечныя смерти, достоблаженнии Борисе и Глебе, души ваша украсили есте целомудрием, смирением, кротостию и прочими добродетелми, и прешедше поприще временныя жизни, венцев неувядаемых сподобистеся. И ныне, предстояще Престолу Господа Славы, молитеся прилежно о чтущих память вашу и вопиющих Богу: Аллилуиа.

Икос 10

Стена и заступление, богомудрии угодницы Борисе и Глебе, есте Отечеству в годину скорби и нестроений, и прибежище всем, с верою призывающим вас на помощь во всяких бедах и напастех, дерзновение бо велие имуще, святии у Христа Бога помогати и спасати вопиющих вам таковая:

Радуйтеся, неисчерпаемии источницы божественных исцелений.

Радуйтеся, реки чудес и дарований духовных.

Радуйтеся, яко сущим в бедах и напастех избавление подаете.

Радуйтеся, ослепленным владимирцем князем Мстиславу и Ярополку Ярославичем, в церковь вашу на Смядыни пришедшим, прозрение даровавшии.

Радуйтеся, Димитрию Донскому победити татарскаго царя Мамая помогшии.

Радуйтеся, благоверному князю Александру Невскому на помощь противу велегра свейскаго с небес явльшиися.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 11

Пение хвалебное и благодарственное приносим дивному во Святых Своих Богу нашему, даровавшему Церкви Своей и стране Российстей дивных чудотворцев, священную двоицу Бориса и Глеба, иже ныне со Ангельскими чины и со всеми святыми вопиют на небеси: Аллилуиа.

Икос 11

Светозарнии светильницы незаходимаго Солнца Правды Христа Господа явистеся, добропобеднии Борисе и Глебе, земли Российския покровителие и защитницы, ихже ныне священную память совершающе, во умилении душ и сердец вопием:

Радуйтеся, веселие и радование стране нашей.

Радуйтеся, крепости и забрала воинов христолюбивых.

Радуйтеся, Престолу Господа Славы предстоящии.

Радуйтеся, зарею Трисолнечнаго Света озареннии.

Радуйтеся, яко отверзошася вам врата Эдемская.

Радуйтеся, яко лицем к лицу Господа зрите.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 12

Благодать единения и братолюбия испросите у Бога Отечеству вашему, святии миротворцы Борисе и Глебе, да вси людие российстии возлюбят друг друга и единодушно исповедуют Православную веру, воспевающе Христу, Спасителю нашему песнь: Аллилуиа.

Икос 12

Поюще добродетельное ваше житие, преисполненное нелицемерныя любве к Богу и ближним, мученическую кончину и славу на небеси и на земли по преставлении вашем, прилежно молим вас, блаженнии братие Борисе и Глебе: не возгнушайтеся нас грешных и недостойных, зовущих к вам:

Радуйтеся, Господеви верно послужившии.

Радуйтеся, светом и солию земли Российския явившиися.

Радуйтеся, добродетелем отца своего подражавшии.

Радуйтеся, вкупе с ним в радость Господа вшедшии.

Радуйтеся, сонму мученик сопричтеннии.

Радуйтеся, в лице Российстих Святых славою многою от Бога превознесеннии.

Радуйтеся, святии страстотерпцы Борисе и Глебе, теплии о нас пред Богом молитвенницы.

Кондак 13

О преславнии и пречуднии чудотворцы, святии страстотерпцы Борисе и Глебе, приимите от нас сие малое приносимое вам моление, и вашими молитвами у Престола Божия утвердите в стране нашей мир и благочестие: Церковь Святую сохраните от ересей и расколов, и всех православных христиан оградите от враг видимых и невидимых, от неверия и развращения, от бед и скорбей, да благодарни суще, вопием Спасителю Христу Богу нашему: Аллилуиа.

Кондак сей глаголи трижды, таже Икос 1 и Кондак 1

Молитва

Святии страстотерпцы, боголюбивая двоице, благовернии князи Борисе и Глебе, измлада всею душею Христа возлюбившии, целомудрие, кротость, смирение и прочия добродетели стяжали есте, и яко агнцы незлобивии, от брата своего неправедное убиение претерпели есте, чистыя своя души в благоприятную жертву Богу принесосте и от Него венцы нетленныя приясте, припадающе к честному образу вашему, молим вас в дусе сокрушенне и смиренне: вознесите своя усердныя молитвы ко Всемилостивому Спасу нашему, да подаст нам, чтущим святую память вашу, великия своя и богатыя милости. Церковь Свою Святую да соблюдет от ересей и расколов, в чадех ея да оживет дух правыя веры и любве, дух ведения и благочестия, да дарует всем нам вся, яже к жизни временней и вечней потребная. Ей, святии страстотерпцы, ускорите на помощь к нам, якоже сроднику вашему благоверному князю Александру Невскому и избавите страну нашу от враг видимых и невидимых, от глада, огня, смертоносныя язвы, от всяких бед и напастей: разгоните облежащий ны мрак неверия и развращения, да мирно и благочестно поживем в веце сем и сподобимся христианския кончины и добраго ответа на Страшнем Суде Христа Бога, Емуже подобает честь и поклонение со Безначальным Его Отцем и Пресвятым Животворящим Духом, ныне и присно и во веки веков.

Аминь.

Святым благоверным князьям и страстотерпцем Борису и Глебу

Кондак 1

Избраннии и всехвальнии страстотерпцы Христовы Борисе и Глебе, благословеннии чада просветителя нашего равноапостольнаго Владимира, от идольскаго нечестия в чудный свет веры Христовы пришедшии и кровь пролиявшии за веру во Христа Бога нашего, похвальная пения вам приносяще, мы, недостойнии, во гресех и скорбех наших прибегаем к вашему заступлению, вы же, яко дерзновение имущии ко Господу, молите Его, Всеблагаго Царя Славы, даровати милость почитающим святую вашу память и во умилении сердца поющим вам: Радуйтеся, Борисе и Глебе, великии и славнии страстотерпцы.

Икос 1

Ангельски поживше на земли, венец мученический улучили есте, святая братия по плоти Борисе и Глебе, все бо упование свое возложивши на Господа, от руки братней, яко овчата незлобивая, заклани бывше, всех себе, своя души и юная телеса Господу предали есте; сего ради, ублажая всечестную вашу память, от всея души нашея воспеваем вам:

Радуйтеся, незлобивии агнцы, Господу, яко овча на заколение веденному, подражавшии;

Радуйтеся, кротции голубие, заповедь Христову в кротости сохраншии;

Радуйтеся, от руки брата по плоти смерть без ропота приявшии;

Радуйтеся, Авелю ветхозаветному, рукою брата убиенному, уподобившиися;

Радуйтеся, венцем небесныя славы увенчаннии;

Радуйтеся, онаго венца небеснаго мученьми достигшии;

Радуйтеся, Борисе и Глебе, великии и славнии страстотерпцы.

Кондак 2

Весть о кончине отца своего великаго Владимира слышавши, святый князь Борис много плакашеся, глаголя: «Увы мне, отче мой, свете очию моею, сияние и заре лица моего, увы мне, како зашел еси, свете мой, не бывшу мне при твоем скончании, да сам честное твое погребл тело, почто не сподобился лобызати честная седины твоя, отче мой». Таковым рыданием много тужаше на брезе реки Альты, идеже стояше с воинством; во время же сие Святополк, Каину подобный, брат сый, умышляше; «Погублю братию мою всю и единовластвовати буду». Собра же убийцы, повеле им убити тебе, святый Борисе; ты же сего лукаваго брата своего почитал еси, воздавая честь ему, яко старейшему, и смерть от него прияв, Богу за вся воспевал еси: Аллилуиа.

Икос 2

Разум Божественный испроси нам, святый Борисе, еже подражати, якоже и ты, Господу рекшему: «Не убойтеся убивающих тело, души же не могущих убити», и в саду Гефсиманстем волею в руце мучителей вдавшемуся; ты бо, всеблаженне страстотерпче, не сопротив стал еси врагу, сущу брату твоему, и по услышании, яко хощет тя убити, стоящу бо ти на Альте реце рекоша киевскии бояре: «Гряди в Киев и сяди на престоле отчем, се бо и вои отчии с тобою суть», ты же рекл еси им: «На старейшаго брата не иду, его же яко отца имам». Слышавше убо сия, разыдошася вси, точию ближняя слуги осташася с тобою, с ними же и шел еси ко брату твоему Святополку, еже поклонитися яко старейшему князю; сретше же на сем пути твоем, вестник некий глаголаше ти о злом умышлении Святополковом, - сему такожде не ял веры, ведуще себе ни в чесомже согрешивша противу брата твоего. Ведуще убо сия добрая нрава твоего, вкупе с блаженным братом твоим Глебом вопием вам:

Радуйтеся, кротции агнцы, противу вепря, брата, ничем же противуставшии;

Радуйтеся, велиции исповедницы имене Христова даже до крове вашея;

Радуйтеся, земнии ангели, чистотою душ ваших небесных чертогов достигшии;

Радуйтеся, мира сего мученицы, горних же высот блажени насельницы;

Радуйтеся, мира дольняго странницы, горняго же блаженства вечнии наследницы;

Радуйтеся, Борисе и Глебе, великии и славнии страстотерпцы.

Кондак 3

Силою Вышняго укрепляем, небоязненно приял еси смерть, блаженне Борисе, молитвою и верою в Создателя своего быв укреплен, аще же яко человек и тужил еси, обаче и Сам Господь Иисус Христос в нощь лютых страданий в Гефсимании моляшеся со слезами до пота кровава; своему убо Владыце уподобляяся, и ты печалию одержим быв, но возложивши все упрвание свое на Господа, в день той же бяше суббота, вшед в шатер свой, молился еси с плачем Христу Богу и Пречистей Богоматери; во утрии же недели, певаемей утрени, весть приим яко убийцы твои близ есть, ждуще молитвы твоея скончание, прилежне молился еси и, егда совершися служба Божественная, всего себе предав воле Творца всяческих, Ему же за вся воспел еси: Аллилуиа.

Икос 3

Имуще душу твою устремленную в горняя в чаянии смерти, ты, святый Борисе, прилежнее убо начен молитися, глаголя: «Господи, что ся умножиши стужающии ми, мнози востают на мя», - и прочее псалма того и, паки чтуще Псалтирь со многим умилением, глаголаше псалом оный, в нем же суть словеса сия: «К Тебе привержен есмь от ложесн, от чрева матери моея. Бог мой еси Ты, да не отступиши от мене, яко скорбь близ, яко несть помогаяй ми; Ты же, Господи, не удали помощь Твою от мене, на заступление мое вонми», - и прочая Псалтири Давидовы, от нея утешение почерпая и подавая образ терпения во злостраданиих и еже вящше поучатися в Законе Господни день и нощь. Сего ради тебе и святому брату твоему Глебу во умилении сердца глаголем:

Радуйтеся, яко крини сельнии, во утрии дне жития дерзновенно урезаннии;

Радуйтеся, красотою чистых душ ваших паче оных украшеннии;

Радуйтеся, гроздие винограда Божественнаго, кровь вашу, аки вино, в жертву Господеви источившии;

Радуйтеся, древа светлоплодовитая, рая всечестнаго шумом листвий своих Содетеля всех отверзти врата молящая;

Радуйтеся, древа, псалмопевцам воспевая, плодами духовными любве и веры Церковь возвеселившая;

Радуйтеся, двоице святая, во псалмех воспитанная и сладчайшими псаломскими словесы в час смертный укрепленная;

Радуйтеся, Борисе и Глебе, великии и славнии страстотерпцы.

Кондак 4

Бурею скорбных помышлений одержим бе святый Борис по скончании утренняго пения и, взирая на икону Христову, с плачем глаголаше: «Господи Иисусе Христе, сим человеческим образом явлейся на земли спасения ради нашего и изволивый на кресте пригшвоздитися грехов ради наших, Ты и мене сподоби о Имени Твоем претерпети страдание сие, еже не от сопротивных, но от брата моего приемлю неповинно, и не постави ему, Господи, в грех сего». Таковей молитве, великий страдальче Борисе, дивящеся, да сподобимся и мы грешнии подражати тебе, якоже ты Господу, на кресте возносимому, глаголавшему: «Отче, отпусти им, не ведят бо, что творят», и первомученику архидиакону Стефану, камением побиваему бывшу и вопиявшему: «Господи, не постави им греха сего», и подражая тебе, воспеваем присно песнь хваления за вся Господу: Аллилуиа.

Икос 4

Слышавше сия молитвенная и кроткая о мучителех своих глаголы святаго Бориса, жестокосердии убийцы никакоже умягчишася, но паче исполняхуся злобою и, яко зверие лютии, внезапу нападоша на тя, святый страдальче, со оружием, обнаженными мечи и копии, и ударив тя, прободоша и повергоша на землю. Сие убо воспоминая, содрогаемся, и тебе и блаженному Глебу похвальная восписуем сия:

Радуйтеся, велиею любовии пламеневшии даже до крове;

Радуйтеся, веру до лютаго скончания жития вашего непорочно сохраншии;

Радуйтеся, словом и житием своим Агнца Христа велегласно проповедавшии;

Радуйтеся, и сами за Него заклани бывше, якоже агнцы;

Радуйтеся, от временныя жизни сея преставившиися к жизни нестареемей;

Радуйтеся, от суетныя скорогибнущия славы преселившиися ко славе вечней;

Радуйтеся, Борисе и Глебе, великии и славнии страстотерпцы.

Кондак 5

Чужде убийцем милосердие воистину, егда заклавши тя, святе Борисе, нечестивии, зря тя повержена на земли, абие взяша и, обвивше в шатер якоже плащаницею, возложиша на колесницу и везоша с собою и сретоша два варяга, посланнии от Святополка, и тии приникше видеша еще дышуща, обаче сие подвиже их паче на ярость, и извлек един от них меч свой, вонзе в сердце твое, и тако скончался еси, о великий мучениче, от зверонравных людей люте терзаемый, Господу же Мздовоздаятелю воспевший немолчно: Аллилуиа.

Икос 5

Узре смерть святаго Бориса, верный слуга его Георгий паде на тело господина своего и сице глаголаше: «Не оставлю тебе, господине мой любимый, но идеже красота тела твоего увядает, тамо и аз скончаю живот мой». И сия убо любовь слуги никакоже коснуся злых сердец: вземше убо копия, прободоша и Георгия, якоже и Бориса, таже Иудину нраву поревновавше, прельщени бывше златою гривною на выи Георгиевой, даром Бориса верному рабу своему, иже сняти никакоже бе мощно, отсекоша того ради главу Георгиеву; и мнози отроцы Борисовы таможде побиени бывше, сострадальцы господину своему явившася. Сие лютое дело чад сатанинских умными очима нашима созерцая, благоговейне поем мученицем:

Радуйтеся, Борисе и Глебе, Святыя Руси новии страстотерпцы;

Радуйтеся, прославленнии в лице святых мученик;

Радуйтеся, и с собою приведшии лик сострадальцев;

Радуйтеся, увенчаннии нетленною славою мученических венцев в горних обителех;

Радуйтеся, земную плачевную юдоль пренебрегшии, зря умными очима славу небеснаго чертога;

Радуйтеся, онаго чертога достигшии и венец победы от Христа приявшии;

Радуйтеся, Борисе и Глебе, великии и славнии страстотерпцы.

Кондак 6

Проповедует мир христианский величие страданий святых мучеников Бориса и Глеба, имея их, яко путеводителей своих к Горним Селениям, глаголет бо святый Симеон Метафраст, списатель деяний святых Божиих, яко: «Жития и подвиги святых подобятся светлости звезд, якоже бо звезды положением на небеси утверждени суть, всю же поднебесную просвещают, тыяжде и от индиан зрятся, не сокрываются бо и от скифов, землю озаряют и морю светят, и плавающим корабли управляют, ихже имен аще и не вемы множества ради, обаче светлей доброте их чудимся, сице светлость святых, аще и затворены суть мощи их во гробех, но силы их в поднебесней земными пределы не суть определены». Чудимся тех житию и удивляемся славе, еюже Бог угодившия Ему прославляет, воздвигая и нас хладных ко славословию Имени Его пети со умилением: Аллилуиа.

Икос 6

Светом Троическим просвещаемии в горних обителех души мученическия, выну предстоящии Престолу Того, за Него же лютыя муки претерпеша на земли, свыше от оных горних чертогов молитвами своими низпосылают нам от Творца всяческих мир и благоденствие, аще токмо память их чтим и просим помощи их усердно, не усты токмо, но и паче сердцем; почитая тако и память святых страстотерпцев Бориса и Глеба, во умилении сердечнем глаголем:

Радуйтеся, доблестнаго лика мученическаго светлое сияние;

Радуйтеся, всего рода христианскаго славо и украшение;

Радуйтеся, добродетелей Евангельских честная вместилища;

Радуйтеся, взыскателие небеснаго вечнаго сокровища;

Радуйтеся, венцем вечнаго веселия на небеси увенчаннии;

Радуйтеся, и нас, сущих на земли, помощию своею не оставляющии;

Радуйтеся, Борисе и Глебе, великии и славнии страстотерпцы.

Кондак 7

Мира суетнаго сладости не удержаша вас на земли, мученицы святии Борисе и Глебе, от княжеския славы ко славе вечней прешедше, оную бо вечную святую красоту небес умными очима зрели есте. Сея сладости лютым путем мучения достигосте и тамо во храме Небесныя дивныя Божия славы у Престола Вседержителя Бога воспеваете выну: Аллилуиа.

Икос 7

Егда прободен бе святый Борис и тайно без единыя почести погребен в Вышгороде, Святополк зверонравный помышляше в себе, како и Глеба убити; сей же убо Глеб от единыя со святым Борисом матере сын бе Владимиру, юн сый, нравом кроток, тих и незлобив. Сему убо княжащу в Муроме, посла Святополк, лестно глаголюще: «Отец вельми болит и зовет тя к себе, хотяще видети тебе, гряди убо, борзяся в малей дружине». Вняв убо сим глаголам, Глеб святый скоро потщися иде в Киев, не испытуя вести сия, любяше бо отца своего и крепким желанием горя облобызати его честныя седины. Мысленне воспоминая сие скорое твое течение ко смерти, тебе и брату твоему Борису умильно зовем:

Радуйтеся, лестию уловленныя и к смертному пределу земныя жизни вашея скоро текшия;

Радуйтеся, лютыми страданьми небеснаго покоя достигшии;

Радуйтеся, о телесех своих всячески небрегшии;

Радуйтеся, души ваша Господеви приобретшии;

Радуйтеся, земную плачевную юдоль без сожаления оставльшии;

Радуйтеся, небесную славу улучити сподобльшиися;

Радуйтеся, Борисе и Глебе, великии и славнии страстотерпцы.

Кондак 8

Странно есть людем христолюбивым видети, како брат окаянный избиваше братию за почести Великаго на Руси князя и богатство многих градов и областей, но таковы убо мысли людей нечестиваго века сего и таковы козни людей, яже не Богу служат, не о Бозе помышляют, но похотем своим и миру погибельному усердно работают, в помрачении ума и сердца своего дерзкия хулы изрыгая на Господа Творца всяческих; мы же, благоговейно почитая память мучеников, Богу Благодетелю нашему вопием выну песнь хвалы: Аллилуиа.

Икос 8

Весть прием от сестры своея Предиславы из Киева, брат святых мученик Ярослав, князь Новгорода, возвести святому Глебу о лукавствии Святополка, текущу же скоро в Киев Глебу и пришедшу ему на устие Волги, нощию потчеся под ним конь в рове и вреди ему мало ногу, того ради седе в ладию, плывше до Смоленска и в урочище, Смядень глаголемое, приставшу ему ко брегу, достиже тая весть Ярославова: «Не иди в Киев ко Святополку, понеже отец наш уже умре, Святополк же уби Бориса и тебе хощет убити». Сию весть слышавши, святый Глеб много плакася по отце и убиеннем брате, мы же, внемлюще сему благосердому плачу, от глубины души взываем святым страстотерпцем сице:

Радуйтеся, земному отцу послушествоваше и любве Отца Небеснаго сподобистеся;

Радуйтеся, яко от отца земнаго Небесному Отцу сопричтостеся;

Радуйтеся, велию любовь ко отцу своему земному даже до смерти своея неослабно имевшии;

Радуйтеся, любовию небесною, аки огнем, пламеневшии и ею в чертоги Отца Небеснаго притекшии;

Радуйтеся, небеснаго утешения паче земнаго во псалмех Давидовых взыскавшии;

Радуйтеся, всякую земную радость презревшии;

Радуйтеся, Борисе и Глебе, великии и славнии страстотерпцы.

Кондак 9

Вести о убиении брата Бориса пришедшей, и сами убийцы от Святополка достигоша тебе, Глебе святый, и нападоша на ладию твою; ты же, узрев разбойники тыя, воздев руце своя, со слезами моляшеся псаломскими словесы, якоже и Борис, сими спасительными словесы Давида Псалмопевца, егоже во святей купели Крещения наречен был еси: «Суди, Господи, обидящия мя, побори борющия мя, приими оружие и щит и востани в помощь мою; изсуни меч и заключи сопротив гонящих мя, рцы души моей: Спасение твое есмь Аз». Посреде тоя молитвы трапезарь твой, имея вражду на тя, ем тя созади за главу, вонзе нож в гортань, и, аки агнца непорочна, закланием предаде смерти. Да умягчит жестокая сердца наша Господь и наставит посреде сени смертныя воспевати, якоже и тии страстотерпцы, песнь хваления: Аллилуиа.

Икос 9

Витийство всякое суетных мудрецев века сего окаяннаго не постигнет и не разумеет доблественнаго страдания страстотерпец святых Бориса и Глеба, како сии юныя леты победиша страх смертный, како не прилежали миру, но Бога возлюбивше, Ему Единому всех себе предали суть, смерть приявши, хвалу воспевая Господеви; сего суетнии люди постигнути не могут, и врази Креста Христова сущи, Христа Бога уничижают, хулы глаголют и на святых Его, обаче не ведают Писания, яко Бог поругаем не бывает. Мы же, ублажая житие и кончину страстотерпец святых Бориса и Глеба, усердно им вопием:

Радуйтеся, юродивую мудрость мира презревшии и горния мудрости взыскавшии;

Радуйтеся, в скорбех земных небрегшии и радость небесную обретшии;

Радуйтеся, Агнца ради Христа, и сами в подобии агнцев заклание претерпевшии;

Радуйтеся, от мрака земнаго к Небесному свету устремившиися;

Радуйтеся, горняго мира святии наследницы;

Радуйтеся, дольняго мира, по слову Апостола, мудрии странницы;

Радуйтеся, Борисе и Глебе, великии и славнии страстотерпцы;

Кондак 10

Спасению душ наших послужиша, мученицы святии, показаша бо нам, яко болезни тела Христа ради душу спасают и очищают от грехов. Темже молим вас, мученицы Христовы Борисе и Глебе, молитеся за ны ко Господу, спасите души наша предстательством своим, правдивые страстотерпцы и истинные Евангелия Христова послушатели, да молитвами вашими управляеми, достигнем Небеснаго Царствия и тако воспоем Господу, Победителю смерти и ада: Аллилуиа.

Икос 10

Свет чудес и исцелений возсия от телес ваших, святии страстотерпцы, положенным бывшим мощем вашим в Вышгороде, первее под спудом, таже изнесенным от земли во храм, от брата вашего Ярослава созижденный; по мнозех же летех князь Мономах Владимир, храму каменну созданну бывшу, внесе в онь святая телеса ваша, чудесы сияющая. Сия благоговейне воспоминая, умиленно глаголем вам, святии:

Радуйтеся, вместилища благодатных дарований Духа Божественнаго, Его же храмы нерукотворенныя телеса ваша суть;

Радуйтеся, даром благодатии сия отроку, скорчену имуще ногу, исцеление явлением своим подавшии;

Радуйтеся, слепцу прозрение даровавшии, и хромому отсечену ногу имущу и принесену бывшу к раце мощей ваших, ногу во единем часе во удивление всех зрящих возрастившии;

Радуйтеся, жену некую, не почетшую дне Святителя Николая, усушением руки вразумившии и, по слезном покаянии у мощей ваших, исцелившии;

Радуйтеся, тому же Святителю Николаю поревновавшии, оклеветанных князю Михаилу неправедно мужей от темницы свободившии;

Радуйтеся, Борисе и Глебе, великии и славнии страстотерпцы.

Кондак 11

Пения похвальная приносит вам, святии страстотерпцы, земля ваша от дней преставления вашего страдальческаго и до днесь, воздвигает храмы имени вашему, почитает дни страданий ваших, величается о имени вашем. Переяслав, древний град отца вашего Владимира, совершая во вся лета в память вашу крестная хождения по брегу реки Альты, на нейже святый Борис заклан бысть, радуется. Радуется и весь Бориспольская, яко весь Борисова нареченная вспоминанием страстей ваших. Сего ради в радости духовней вопием: возсия днесь преславная память ваша, страстотерпцы Христовы Романе и Давиде, созывающи нас к похвалению Христа Бога нашего, тем, притекая к вам, исцеления дар приемлем, вы же с лики ангельскими предстояще Святей Троице, молитеся спастися нам, поющим во умилении сердца Богу: Аллилуиа.

Икос 11

Страшную казнь прияв от правосуднаго Господа, новый Каин – Святополк, иже прозвание окаяннаго от потомства ему дадеся, по убиении страстотерпцев святых Бориса и Глеба и третияго брата Святослава умертвил есть, абие же по сих Ярослав собра вои, подвижеся ратию на Святополка и победи его на месте убиения Бориса святаго по мнозей молитве сицевой: «Кровь братий моих вопиет от земли к Тебе, Владыко, Господи Боже мой, но молю Тя, Всеблагий Творче, Судие Праведный, отмсти кровь праведных сих, якоже кровь Авелеву на Каине, положив на него трясение, тако положи трясение и на сем окаяннем Святополке, яко да не возможет проливати более крови братния и христианския». И бысть тако по молитве сей: стеня и трясыйся, якоже Каин, бежа Святополк чрез всю землю Ляшскую, вопия: «Се женут нас, бежите, бежите», и в пустынех Ляхии и Чехии сконча живот свой. Ужасом одержимии, зря лютую кончину окаяннаго, вопием вам, мученицы святии:

Радуйтеся, незлобиво смерть приявшии, научите смирению и нас, гордостию возносящихся;

Радуйтеся, от властолюбия мученнии, свободите ны от духа любоначалия;

Радуйтеся, не сопротив ставшии врагу, сущу брату вашему, дадите и нам крепость в несении скорбей;

Радуйтеся, не противльшиися злому ухищрению, ниспошлите и нам дивный дар терпения;

Радуйтеся, крепости Божественной исполненнии, укрепите ны на пути спасения;

Радуйтеся, от соблазнов суетнаго мира отвергшиися, молитвами вашими нас вечнаго плача исхитите;

Радуйтеся, Борисе и Глебе, великии и славнии страстотерпцы.

Кондак 12

Благодатию, данною вам от Бога, во еже помогати скорбящим и озлобленным, помощь даровали есте, святии, князю Александру на реце Неве противу свеев, виде бо вас при захождении солнечном воевода Филипп, на реце посреди корабля стоящих и плывущих: «Гребцы же седяху, аки мглою одеяни», и слыша глаголание сие: «Брате Глебе, пойдем скоро да поможем сроднику нашему», и во утрий день Александр победи враги и короля их уязви мечем в лице. Такожде и Димитрию во одоление Мамая явили есте помощь, воздвизая пети Богу, сицевая благодеющему: Аллилуиа.

Икос 12

Поюще ваша, святии страстотерпцы Борисе и Глебе, страдания, ублажаем ваше дивное непостижимое терпение и, почитая святую память вашу, молимся вам: сохраните мирну страну нашу, великим отцем вашим святым Владимиром во Святем Крещении просвещенную, укрепите дух и руце православных, борющихся со мглою неправды, даруйте совершенную победу истины и света над тьмою неверия и безбожия и приимите похвальная сия:

Радуйтеся, истинная Евангелия послушателя, даруйте и нам оное разумение Евангелия;

Радуйтеся, Закона Христова богописанныя скрижали, дадите и нам сего Закона разумное ведение;

Радуйтеся, целомудрия хранителие от младости, научите и нас воздержанию плоти в веце сем прелюбодейнем и грешнем;

Радуйтеся, незлобия учителие, покажите и нам незлобия путь к Царствию Небесному;

Радуйтеся, о убиении телесе небрегшии, дадите и нам мужество против убивающих тело, души же немогущих убити;

Радуйтеся, правую веру до конца сохраншии, обличите тыя, яже от веры отеческия правыя отпадают;

Радуйтеся, Борисе и Глебе, великии и славнии страстотерпцы.

Кондак 13

О всехвальнии страстотерпцы Христовы Борисе и Глебе, во святей купели Крещения Романе и Давиде нареченнии, призрите с высоты небесныя на нас грешных, скорбящих и озлобленных, милости Божия и помощи требующих, услышите глас моления нашего, тепле вам возносимый, и от всяких зол, болезней и бед свободите ны. В час же кончины нашея укрепите слабеющий дух наш, да во исходе нашем от бреннаго сего тела, таможде, у дивнаго Престола Царя Славы, с лики ангельскими воспоем: Аллилуиа.

Этот Кондак читается трижды, затем Икос 1 и Кондак 1.

Молитва

О двоице священная, братие прекрасная, доблии страстотерпцы Борисе и Глебе, от юности Христу верою, чистотою и любовию послужившии и кровьми своими, яко багряницею, украсившиися и ныне со Христом царствующии, не забудите и нас, сущих на земли, но яко теплии заступницы, вашим сильным ходатайством пред Христом Богом сохраните юных во святей вере и чистоте неврежденными от всякаго прилога неверия и нечистоты, оградите всех нас от всякия скорби, озлоблений и напрасныя смерти, укротите всякую вражду и злобу, действом воздвизаемую от ближних и чуждых. Молим вас, христолюбивии страстотерпцы, испросите у Великодаровитаго Владыки всем нам оставление прегрешений наших, единомыслие и здравие, избавление от нашествия иноплеменных, междуусобныя брани, язвы и глада. Снабдевайте своим заступление всех, чтущих святую память вашу во веки веков.

Аминь.

Святым Благоверным князем и мучеником Борису и Глебу, во святем крещении Роману и Давиду, Российским Чудотворцам

Кондак 1

Избраннии чудотворцы и доблественнии воини Христовы, благаго корене блазии отрасли, пресветлая двоице, в недузех безмезднии врачеве и ко Спасу о всем мире теплии молитвенницы, восхваляем вас любовию, святии и благовернии князи, Борисе и Глебе: вы же, яко имущии дерзновение ко Пресвятей Троице, от всяких нас бед избавите, да зовем к вам:

Радуйтеся, Борисе и Глебе, велицыи Российстии Чудотворцы.

Икос 1

Ангелов Господних сограждане явистеся святии благовернии Борисе и Глебе, не оставляюще сограждан земнаго мира: по страдании бо вашем честная телеса ваша, мученическою кровию обагренная, и Благодатию Божиею прославленная, всем, с верою к ним притекающим и прикасающимся, источают многоразличная чудесная исцеления: души же ваша предстоят с лики ангельскими и со всеми святыми Пресвятей Троице. Темже мы, российстии сынове, удивляющеся вашему горнему и дольнему гражданству, благоговейно преклоняюще пред вами колена телесная и сердца наша, умильно вопием сице:

Радуйтеся, яко Вышним Богом из тьмы идолослужения в чудный свет истинного Богопознания приведени есте;

Радуйтеся, яко чада, паче всех возлюбленная благоверному отцу Вашему;

Радуйтеся, истиннии Евангелия Христова последователи;

Радуйтеся, Божественных Писаний добрии ученицы;

Радуйтеся, одежды крещения непорочнии хранители;

Радуйтеся, христианскаго благочестия приснии ревнители;

Радуйтеся, яко неустрашимо страдания мученическая прияли есте;

Радуйтеся, Христовым страстем подражатели;

Радуйтеся, благоугодившии Богови словом и житием;

Радуйтеся, всельшиися во обители Отца Небеснаго;

Радуйтеся, мзду трудов и терпения вашего восприявшии от Господа;

Радуйтеся, облеченнии виссоном чистоты и непорочности;

Радуйтеся, молитвами Вашими ко Господу многим заступничество явили есте;

Радуйтеся, Борисе и Глебе, велицыи Российстии Чудотворцы.

Кондак 2

Видевше сынове российстии святый храм, исполненный благоухания пречуднаго, внегда отверзоша раку и обоняша оное, вси прославиша Бога, темже и мы грешнии и недостойнии благоговеюще пред пречудною святынею, прославляем дивнаго во святых Своих Бога, непрестанно вопиюще: Аллилуиа.

Икос 2

Разум здравый стяжавшии святым и боогоугодным вашим житием, страстотерпцы Христови, Борисе и Глебе. Егда услышасте лишение вашего временнаго живота от лютаго и властолюбиваго брата вашего Святополка, нимало не помысливше противу его ратною бранию идти, лучше возжеласте жизни своея лишитися нежели с братом имети брань и христианскую кровь проливати, сего ради мы, предстояще молитвенно пред вами, возводим очеса наша сердечная к вам горе, на небеси живущим, почитающе честная ваша страдания сими похвальными песньми:

Радуйтеся, Живаго Бога паче всего мира возлюбившии;

Радуйтеся, суетных помышлений презрители;

Радуйтеся, венценосцы нарочитии;

Радуйтеся, заповедей Христовых исполнители;

Радуйтеся, оправданий Господних пресветлыя свещи;

Радуйтеся, пресладкии слышатели божественных словес;

Радуйтеся, искуснии хранители церковных правил;

Радуйтеся, тмы греховныя попратели;

Радуйтеся, небесных благ причастницы;

Радуйтеся, никакоже к земным благом сердце свое прилепившии;

Радуйтеся, теплии молитвенницы ко Спасу о душах наших;

Радуйтеся, Борисе и Глебе, велицыи Российстии Чудотворцы.

Кондак 3

Силою божественною подвизаеми, на умоление соотчичей ваших явльшеся, им есте покровители, защитницы и помощницы: страны бо их от нападений вражиих избавляете, страждущих от всяких недугов и болезней исцеляете и во всяком благом преспеянии помогаете всем вопиющим Богу: Аллилуиа.

Икос 3

Имуще воистинну воини Христовы, Борисе и Глебе, пламенное и нехладное сердце ко благохвалению Дивнаго в чудесех Бога, молитеся непрестанно о спасении душ к вам усердно прибегающих. Сего ради мы от глубины сердец наших умиленно приносим к вам таковая пения:

Радуйтеся, Господу славы выну предстоятели;

Радуйтеся, ангельския трисвятыя песни слышатели;

Радуйтеся, невечерняго дне зрители;

Радуйтеся, Царства Христова наследницы;

Радуйтеся, нерукотворнаго храма обитатели;

Радуйтеся, горняго Иерусалима именитии граждане;

Радуйтеся, райских селений созерцатели;

Радуйтеся, храмов Господних и домов благочестивых посещатели;

Радуйтеся, великих праздников и святых угодников почитания наставницы;

Радуйтеся, не радящих о благочестии наказатели;

Радуйтеся, в добродетелех преспевающих споспешницы;

Радуйтеся, Борисе и Глебе, велицыи Российстии Чудотворцы.

Кондак 4

Бурею неверия одержимых, ходящих во тьме злочестия и не брегущих о христианском благочестии огнем наказания опаляете, да тем уцеломудрившиися истинно познают Истиннаго Бога, благочестно Его чтуще и со страхом Ему вопиюще: Аллилуиа.

Икос 4

Слышаще ваша, страстотерпцы святии Борисе и Глебе, чудеса, российстии сынове не токмо из ближних, но и из дальних стран российских стекаются к вашим чудодействующим мощем, и исцеляющеся от недугов и болезней вопиют к вам таковая:

Радуйтеся, первии в России угодницы Христовы;

Радуйтеся, велицыи в напастех утешители;

Радуйтеся, в убожестве и нуждах благочестивым пособницы;

Радуйтеся, веры Христовой ревнители;

Радуйтеся, ересей искоренители;

Радуйтеся, расколов презрители;

Радуйтеся, божественныя службы пламенныя любители;

Радуйтеся, винограда Христова многолиственная древеса, имиже покрываются мнози;

Радуйтеся, Божественныя Лозы пресладкое рождие;

Радуйтеся, благочестия добрии строители;

Радуйтеся, истиннии и безмезднии врачеве;

Радуйтеся, о спасении рода христианскаго ходатаи;

Радуйтеся, Борисе и Глебе, велицыи Российстии Чудотворцы.

Кондак 5

Боготечныя звезды явистеся нам в земной юдоли сей: внегда бо обуреватися нам волнами житейских попечений и направляти путь житейскаго шествия своего к тихому пристанищу, вашими молитвами избавляеми есмы от блуждения и потопления: сего ради, славяще Господа вопием: Аллилуиа.

Икос 5

Видевше сынове российстии, яко притекающии к вам с верою, приемлют ходатайством и заступничеством вашим в нуждах скорое утешение и избавление от зол, восхваляют вас сице:

Радуйтеся, российских стран недремлющии стражи;

Радуйтеся, идольскаго нечестия обличители;

Радуйтеся, гордыни и буесловия посрамители;

Радуйтеся, мудрым к вере и благочестию правители;

Радуйтеся, добрии воини Христовы;

Радуйтеся, враждующих на землю отцев ваших укротители;

Радуйтеся, злобы и мщения угасители;

Радуйтеся, полчищ вражеских расточители;

Радуйтеся, яко прославившии Бога в душах и телесех ваших;

Радуйтеся, яко прославлени есте на земли чудодействием;

Радуйтеся, яко благородство носивше, сподобистеся царствовати в Царствии Небеснем;

Радуйтеся, во отечествии своем мира, тишины и спокойствия возстановители;

Радуйтеся, Борисе и Глебе, велицыи Российстии Чудотворцы.

Кондак 6

Проповедующи, проповедует вся Российская Держава ваше небесное предстательство у Всевышняго: вы бо яко крепцыи щити и яко твердыя стены, ограждаете отечество ваше яко непобедимым оружием, божественною благодатию дарованным вам свыше: сего ради, хваляще Бога, поем: Аллилуиа.

Икос 6

Возсияли есте, яко пресветлыя звезды от тмы идолослужения просвещением святаго крещения, веру бо православную приявше, обычаи идоложертвенныя искоренили есте, семена благочестия христианскаго в сердцах подданных своих посеявшии, на славословие Имене Божия храмы божественныя благолепно соорудисте. Сего ради, Борисе и Глебе, вас почитаем сими похвальными песнми:

Радуйтеся, из тмы идолослужения в чудный свет истиннаго богопознания преселницы;

Радуйтеся, идолочестия обличители;

Радуйтеся, древняго змия попратели;

Радуйтеся, истиннии образцы кротости и незлобия;

Радуйтеся, Подвигоположнику Христу последователи;

Радуйтеся, жития непорочного рачители;

Радуйтеся, евангельских проповеданий блюстители;

Радуйтеся, нерастленнии храми Бога Живаго;

Радуйтеся, от даров живущей в вас благодати подающии силу многим;

Радуйтеся, добродетелей чистая зерцала;

Радуйтеся, терния пороков ревностнии искоренители;

Радуйтеся, велицыи угодницы Христовы;

Радуйтеся, Борисе и Глебе, велицыи Российстии Чудотворцы;

Кондак 7

Аще и многажды злоумышленнии языцы покушахуся внити во внутрь вашего отечествия и одолети его: обаче невидимым вашим предстательством пред Богом, силою Его постыждени и прогнани быша. Темже удивляющеся неизреченному к нам Божию милосердию поем Богу: Аллилуиа.

Икос 7

Новыя благодати бывшии причастницы и силою даров Святаго Духа исполненнии, не точию в земли российстей явилися есте добрии споспешницы веры и нравов благих: но среди чуждих народов славу Имене Господня и силу мышцы Его проявисте. Сего ради похвальными песнми вас ублажаем:

Радуйтеся, неувядаемии цвети российския земли;

Радуйтеся, непорочнии агнцы стада Христова;

Радуйтеся, яко голубие, чистотою украшеннии;

Радуйтеся, на крилех веры вознесшиися на высоту небесную;

Радуйтеся, в горний Иерусалим пресельшиися;

Радуйтеся, горняго Сиона наследницы;

Радуйтеся, с лики Небесных Сил торжествующии;

Радуйтеся, вертограда небеснаго благолепнии гроздие;

Радуйтеся, Христовы Церкве великое удобрение;

Радуйтеся, всем христианом неизреченных радостей подаватели;

Радуйтеся, Борисе и Глебе, велицыи Российстии Чудотворцы;

Кондак 8

Страная же и ужасная содеяшася, егда злочестивый варяг, дерзнувый коснутися стопами своими места свята, на немже почиваху блаженная телеса ваша: огнь бо исшедый из земли опали окаянного и ведати научи силу вашу, угодницы Божии. Вернии же прославляюще чудодейства ваша, воспеша дивному во святых Своих Богу: Аллилуиа.

Икос 8

Весь ум вперивше в службу божественную и духовная псалмопения, явилися есте яко непобедимии Христовы воини, егда нечестивии человецы приидоша от лютаго Святополка убити вас: обаче не убояшася возложити руки на вас и неповинную кровь вашу пролити. Мы же вернии, чествующе веру и страдания ваша взываем сице:

Радуйтеся, Истиннаго Мессии Иисуса Христа Сына Божия истиннии исповедницы;

Радуйтеся, апостольских проповеданий ревнителнейшии приемницы;

Радуйтеся,Святых Отцев преданий вернии блюстители;

Радуйтеся, яко возлюбисте живот вечный паче временнаго;

Радуйтеся, яко Царство Небесное предпочтосте царству земному;

Радуйтеся, в вере Христовой верным известное утверждение;

Радуйтеся, яко службу Божию при себе всегда иместе;

Радуйтеся, яко божественное чтение и пение сладостию послушасте;

Радуйтеся, яко и сами божественная словеса во устех своих держаще, в сердцы аки неоцененное сокровище носисте;

Радуйтеся, яко дух ваш сокрушенный и сердце ваше смиренное жертва Богу быша;

Радуйтеся, яко души и телеса ваша в страдании, яко злато в горниле, искушени;

Радуйтеся, яко с лики мучеников сопричтени есте;

Радуйтеся, Борисе и Глебе, велицыи Российстии Чудотворцы.

Кондак 9

Вси вернии, чтущии благолепно память вашу, во святем храме вашем стекшеся и славяще страдания ваша и чудеса, яже содеясте силою Бога Спаса нашего, вопиют к Нему: Аллилуиа.

Икос 9

Ветии невернии еще труждаются помышляти и мудрствовати о святыни вашей, Борисе и Глебе, недоумевают убо изрещи, како телеса ваша на земли не истлеваются, души же ваша на небесех в сонмех Ангелов прославляются. Мы же просвещаеми верою, благолепно вопием:

Радуйтеся, воини Христовы непобедимии;

Радуйтеся, крепцыи щити и броня воинства российскаго;

Радуйтеся, Царя Славы прославление;

Радуйтеся, князя тмы посрамление;

Радуйтеся, глаголов Божиих оправдание;

Радуйтеся, Божественныя Премудрости исполнение;

Радуйтеся, чудес Христовых проповедницы;

Радуйтеся, вечныя радости наследницы;

Радуйтеся, яко жизнь грядущую возлюбили есте;

Радуйтеся, яко блага временная презрели есте;

Радуйтеся, яко власти века сего отринули есте;

Радуйтеся, яко красотою добродетелей украшени есте;

Радуйтеся, Борисе и Глебе, велицыи Российстии Чудотворцы.

Кондак 10

Спасти хотяще души своя, святии страстотерпцы, не брегосте о телесех ваших и предасте их на убиение, вопиюще к Богу: Аллилуиа.

Икос 10

Стены есте, ограждающии благоденствие России, святии Борисе и Глебе, и неутомимии стражи противу враг наших пребываете, непрестанно молящеся Господу Богу о спасении душ наших и исцеляюще немощи наша. Сего ради умильно вопием ко святыни вашей:

Радуйтеся, яко сынове российстии ходатайством вашим спасаются;

Радуйтеся, яко вси правовернии молитвами вашими от бед и скорбей исцеляются;

Радуйтеся, яко врази наши вас устрашаются;

Радуйтеся, яко все отечествие наше молитвами вашими спасается;

Радуйтеся, яко похвальными венцы Российская Церковь вас венчает;

Радуйтеся, яко подвиги ваша вси правовернии немолчно воспевают;

Радуйтеся, яко старцы и юноши к покрову вашему прибегают;

Радуйтеся, яко царие и воини, богатии и убозии вас прославляют;

Радуйтеся, скории помощницы;

Радуйтеся, мощнии заступницы;

Радуйтеся, мученическую смерть приявшии;

Радуйтеся, Борисе и Глебе, велицыи Российстии Чудотворцы;

Кондак 11

Пение всеумиленное не умолче во устех ваших, егда лютии губителие устремляхуся на вас, яко на агнцев, готовых на заколение. Сия воспоминающе и славяще Господа, давшаго вам силу таковую, взываем к Нему: Аллилуиа.

Икос 11

Светозарныя свещи видим в вас, святии благовернии князие Борисе и Глебе, освещающии Российскую Церковь и всех верных чад ея, да прославляют святую память вашу, вопиюще:

Радуйтеся, Российския Церкве похвало;

Радуйтеся, Православныя Державы и градов ея лепото;

Радуйтеся, во единем дусе благочестия пожившии пред Господем;

Радуйтеся, телесем вашим стяжавшии безсмертие;

Радуйтеся, яко подвизавшйися подвигом добрым венчается венцем славы невечерния;

Радуйтеся, яко течение жития мученически скончавший, водворится во обители Отца Небеснаго;

Радуйтеся, всехвальнии мученицы;

Радуйтеся, добре подражавшии яко во единем телеси суще, Искупльшему нас Радуйтеся, Борисе и Глебе, велицыи Российстии Чудотворцы.

Кондак 12

Благодать, данную вам от Бога на благо сынов России, российстии чудотворцы Борисе и Глебе, не втуне оставили есте: явиста бо ся целителие болящих, утешителие сущих в скорбех и заключении, наставницы заблуждших и скории помощницы всем, с верою призывающим вас, угодницы Божии: да вси вкупе вопием ко Господу: Аллилуиа.

Икос 12

Поюще и восхваляюще чудеса ваша, чествующе святую память вашу, преславная Церковь Российская, и мы, чада ея, очи сердца возводяще ко Господу, сице вопием:

Радуйтеся, сопротивных врагов победители;

Радуйтеся, недугующих врачеве;

Радуйтеся, российских градов и весей пресветлое сияние;

Радуйтеся, российскаго воинства твердое ограждение;

Радуйтеся, яко страдании вашими снискасте вечную радость;

Радуйтеся, яко вкусивше мученическую смерть прешли есте к блаженному безсмертию;

Радуйтеся, яко искушеннии в горниле житейских обуреваний явистася чистейшии злата, принесшии себе яко всеплодие Богови;

Радуйтеся, корене честнаго благия отрасли;

Радуйтеся, живота вечнаго и Царствия Божия наследницы;

Радуйтеся, яко сопричастницы есте Ангельскому сонму;

Радуйтеся, яко Российская Держава, еяже сынове и заступницы есте, благоговейно память вашу чествует;

Радуйтеся, Борисе и Глебе, велицыи Российстии Чудотворцы.

Кондак 13

О святии и всеславнии чудотворцы Борисе и Глебе, велицыи российстии помощницы в бедах и напастех, не презрите нас грешных: но приимите моление наше, якоже прияли есте молитвы благоверных российских князей Александра и Димитрия, и принесите Всемилостивому Спасу наше молебное приношение, да избавит нас от всяких бед и напастей, да охранит отечествие наше от враг видимых и невидимых, и да вопием с вами ко Господу: Аллилуиа.

Кондак сей глаголи трижды, таже Икос 1 и Кондак 1

Молитва

Святии страстотерпцы, боголюбивая двоице, благовернии князи Борисе и Глебе, измлада всею душею Христа возлюбившии, целомудрие, кротость, смирение и прочия добродетели стяжали есте, и яко агнцы незлобивии, от брата своего неправедное убиение претерпели есте, чистыя своя души в благоприятную жертву Богу принесосте и от Него венцы нетленныя приясте, припадающе к честному образу вашему, молим вас в дусе сокрушенне и смиренне: вознесите своя усердныя молитвы ко Всемилостивому Спасу нашему, да подаст нам, чтущим святую память вашу, великия своя и богатыя милости. Церковь Свою Святую да соблюдет от ересей и расколов, в чадех ея да оживет дух правыя веры и любве, дух ведения и благочестия, да дарует всем нам вся, яже к жизни временней и вечней потребная. Ей, святии страстотерпцы, ускорите на помощь к нам, якоже сроднику вашему благоверному князю Александру Невскому и избавите страну нашу от враг видимых и невидимых, от глада, огня, смертоносныя язвы, от всяких бед и напастей: разгоните облежащий ны мрак неверия и развращения, да мирно и благочестно поживем в веце сем и сподобимся христианския кончины и добраго ответа на Страшнем Суде Христа Бога, Емуже подобает честь и поклонение со Безначальным Его Отцем и Пресвятым Животворящим Духом, ныне и присно и во веки веков.

Аминь.